مرحباً 😊
قبل ما نبلش حكي عن المنحة، هل بتعرف ايش هي منصة كورسيرا ؟
🛑معلومات وتفاصيل عن منحه منصة كورسيرا🛑 ( صار في شويه تعديلات ع شروط المنحه ياريت تقرؤوها )
بما انو بالفترة الأخيرة انضم إلنا كتير شباب وصبايا جداد ع الغروب وتكررت كتير أسئلة عن المنحة وعن منصة كورسيرا بالذات… لهيك رح نرجع نحكي بأهم النقاط للتسجيل و للإستمرار بالمنحة:
- بداية شو هي المنحة، وشو هي منصة كورسيرا، وكيف بسجل عليها؟ هي منحة تغطي كافة الرسوم والتكاليف الخاصة بالكورسات والتخصصات الموجودة على منصة كورسيرا اللي بتعتمد كورسات وتخصصات بمنهج أكاديميي عبر نظام التعلم الافتراضي عن بعد. وهيك بيكون فيك تتعلم كتير مهارات موثقة بشهادات في مختلف المجالات ومن أرقى وأهم المؤسسات التعليميّة والشركات حول العالم. يعني هي المنحة موجودة لتساعدك تطور مهاراتك الحالية وتتعلم كتير مهارات الجديدة. (مع الملاحظه أنو منحه تجمع الشباب السوري ما بتغطي دراسه الماجستير وفي بعض التخصصات أيضاً على منصه كورسيرا ما بتغطيها المنحه… فإذا طلع أنو مطلوب دفع مصاري - والمنحه شغاله على حسابك- معناتا هاد التخصص غير مشمول بالمنحه)
- هون ممكن تشوف خطوات التسجيل
-
لسا فيني سجل عالمنحة؟ وفي شروط معينة للتسجيل متل العمر أو المهنة أو غيرها؟ أي فيك تسجل على المنحة أيمت مابدك و هي متاحة حالياً، وبدون أي شروط إضافية. ( في حال صار أي تغيير فوراً منعدل ع هاد البوست ومنعلن هاد الشي على وسائل التواصل الاجتماعي الخاصه بالتجمع)
-
مين الأشخاص يلي بتقدر تستفيد من منحه تجمع الشباب السوري للإستفاده من كورسات منصه كورسيرا؟ المنحه مقدمه من كورسيرا للاجئين refugees ( هي الصفه بمفهوم الأمم المتحده تعني الأشخاص النازحين داخلياً و اللاجئين لدول أخرى أو الناس عديمي الجنسيه) بالنسبه للسوريين بسوريه… عم نعتبر الطلاب ك أشخاص نازحين داخلياً لأن الاغلب انتقل من محافظه لأخرى ( فهنن ضمن مفهوم اللاجئين) بالنسبه للأشخاص يلي خارج سورية (غير السوريين) منقبل الطلاب يلي عم يعانوا من نفس الصراعات يلي بيعاني منها الشباب السوري ( حروب، أزمات، مشاكل….) ف من هاد الباب نحنا منشملن بالمنحه.
-
كيف فيني اضمن إنو ما اخسر منحتي وتضلها مستمرة؟
لازم تقبل الدعوة خلال أسبوع وتسجل كورس خلال أسبوعين من قبولك للدعوة، وتخلص عالاقل كورس كل ٣ شهور. (يعني مافي تاريخ انتهاء صلاحيه للمنحه… طول ما أنت ملتزم ب انهاء كورس كل ٣ شهور فالمنحه فعالة دائماً على حسابك)
-
انسحبت المنحه مني لأني ما التزمت بشرط: كل ٣ شهور احصل على شهاده من كورس… أو ما عملت اشتراك ب كورس خلال أول اسبوعين من قبولي بالمنحه، أو لأني ما قبلت الدعوه خلال ٧ أيام من وصولها ألي…شو أعمل؟ ارجاع قدم طلب منحه مره تانيه… بكل بساطه. ( ومابيروحو الشهادات السابقة إذا سجلت بنفس الإيميل) ( ملاحظه: إذا خلصت كورس وما اقدرت تاخد الشهاده لأن ماعم تقدر توثق الحساب- أو لأي سبب- ف أنت بتبقى ضمن المنحه )
-
إذا كان عندي حساب مسبق على كورسيرا فيني كمل عليه بالمنحة؟ اكيد بس لازم يكون حساب كورسيرا بنفس الإيميل اللي قدمت عليه عالمنحة.
-
أنا قدمت عالمنحة كيف بعرف إذا تم قبولي أو رفضي؟ مدة دراسة الطلب حوالي ال 15 يوم من تاريخ إرسالك للطلب (كلمه حوالي تعني: زياده يومين أو ناقص يومين)، في حال قبولك بيوصلك إيميل.
-
قدمت عالمنحة وما تم قبولي شو ممكن أعمل؟ قدم من جديد وأكتب رسالة الدافع (150 كلمة) بطريقة مقنعة، بأي لغه بدك ياها.
-
كيف بدي وثق حسابي؟
أول شي…برأيي شوف هالبوست بيحكي عن الموضوع بطريقة مفصلة… بيحكي عن الفروقات بين توثيق الاسم وتوثيق الهويه، لتاخد فكره أكتر، اضغط هنا
🛑( ملاحظه بخصوص التوثيق للسوريين والسودانيين: تجمع الشباب السوري صار بيقدر يوثق حسابات الطلاب السوريين والسودانيين فقط، نظراً لأنو في عقوبات ما بتخليهم يقدروا يوثقوا حساباتون لحالون، ف لهيك نحنا منقدر نوثق هي الحسابات-حصراً للسوريين والسودانيين- و رح حط البوست يلي ذاكرين فيه تفاصيل موضوع التوثيق يلي بيتم عن طريقنا، ياريت تقروه بتمعن👇🏻)
-
إذا سجلت بكورس وتأخرت عن وظيفيتين وعم يعطيني أنو الكورس انتهى، شو الحل؟ من الصفحة الرئيسية للكورس، في بأعلى الصفحة خيار بيكون اسمو Reset my deadlines
-
فينا نعمل Unenroll من كورس نحنا بلشنا فيه وعملنا جزء منو؟ في كورسات منقدر نعملها unenroll بعد اسبوع، في كورسات اسبوعين… ولما ما يعطيني هاد الخيار معناتا ما عاد اقدر اعمل unenroll…وقتا اذا مابدك تكمل بالكورس، خلص اتجاهله.
-
كيف بحصل على شهاده ل كورس خلصتو؟ رح تنبعتلك على إيميلك شهاده للكورس يلي انتهيت منو، وفينك تشوفا بالبروفايل الشخصي تبعك، لما تفتح حسابك من المتصفح، في خيار اسمو Accomplishments ( الإنجازات) فينك تحمل الشهاده منها.
-
طلع اسمي مكتوب بشكل خطأ على الشهادة ( أو مكتوب بالعربي و أنا بدي ياه بالانكليزي، أو مانو مكتوب من الأساس) كيف بغير الاسم؟ بما يخص موضوع تعديل الاسم بتدخل على حسابك من المتصفح في عندك خيار اسمو request name change منو بتعدل اسمك ( أو بتغير اللغة)… في حال ما قدرت أو مامشي الحال فيك تتواصل مع فريق الدعم الخاص بكورسيرا وتطلب منهن يعدلولك اسمك، لأن التعديل حصراً هنن بيقدروا يساعدوك فيه مو نحنا. وبعد ما تغير اسمك، تلقائياً رح يتغير على الشهادة كمان.
-
هل في حد معين لعدد الكورسات يلي بقدر سجل عليها وأحضرها؟ لا… سجل واحضر كورسات واستفيد قد مابدك، مافي عدد معين للكورسات يلي بتقدر تسجلها، وحتى بنفس الوقت بتقدر تسجل على أكتر من كورس. ( مع الملاحظة أنو المنحه ما بتغطي دراسه الماجستير وبعض الدبلومات)
-
يرجى استخدام VPN في حال مافتحت الروابط، أو تغيير ال browser المستخدم.
-
أي مشكله تقنية بتواجهكم، للأسف نحنا مارح نقدر نساعدكم فيا، لازم تتواصلوا مع الدعم التقني لمنصه كورسيرا حصراً لأنو هنن بيقدروا يساعدوكم… مو نحنا 🤷🏼♀️